Rekordet e bitcoin, si pritet të jetë ecuria e çmimit gjatë 2024?

Bitcoin theu në fillim të këtij muaji rekordin e vitit 2021. Kriptomonedha më e përhapur në botë arriti në 72 mijë dollarë dhe ka zbritur ditët e fundit në rreth 65 mijë dollarë, një nivel që mbetet sërish i lartë, po të kemi parasysh se ë raport me të njëjtën periudhë kohore të një viti më parë, vlera e Bitcoin është rritur me mbi 41 mijë dollarë.

Kur u krijua në 2009-n, Bitcoin vlente vetëm 1 cent. Në mbi një dekadë, kriptomonedha ka pasur disa kulme, veçanërisht në vitet 2019 e 2021, kur vlente 11 mijë e 800, e pastaj gati 67 mijë dollarë. Kriza e çmimeve dhe rritja e normave të interesit zhvlerësoi ndjeshëm Bitcoin veçanërisht fundvitin e shkuar, për t’iu rikthyer rritjes së vrullshme këtë fillim-vit.

Bashkë me Bitcoin, vlera u është rritur edhe kriptomonedhave të tjera. Të dhënat nga Coin Market Cap tregojnë se Ethereum po këmbehet për më shumë se 4 mijë dollarë, ndërsa Binance dhe Solana për 526 dollarë.

Rritja e vlerës së Bitcoin është lajm i mirë edhe për shqiptarët që kanë portofole investimi në këtë kriptovalutë. Në Shqipëri përllogaritet të jenë deri në 50 mijë portofole të tilla, kryesisht në Boitcon, vlera e të cilave shkon në rreth 90 milionë dollarë.