Ka mbërritur në Tiranë misioni i radhës i Fondit Monetar Ndërkombëtar. Gjatë dy javëve të qëndrimit do të zhvillohen takime me drejtues t qeverisë dhe stafin teknik të Ministrisë së Financave dhe Bankës së Shqipërisë.
Ardhja e misionit përkon me parashikimin e bërë vetëm pak ditë më parë nga FMN, për një rritje prej 3.6% të ekonomisë shqiptare këtë vit, më të lartë se parashikimi 2.2% i bërë në fillim të vitit.
Takimin e parë, misioni i FMN-së e zhvilloi me ministrin e Financave, Ervin Mete. Ky i fundit informoi përfaqësuesit e Fondit Monetar mbi zhvillimet më të fundit ekonomike dhe pritshmëritë për situatën makroekonomike dhe fiskale, ndërsa nga shefja e misionit, zj. Anke Weber u prezantuan fushat kryesore ku do të fokusohen përfaqësuesit e FMN gjatë ditëve në vijim në takimet me autoritetet shqiptare.
Ministri konfirmoi angazhimin për të vijuar konsolidimin fiskal, përmirësimin e administrimit në mbledhjen e të ardhurave dhe zbatimin e reformave të mëtejshme.
Nga ana e saj, shefja e misionit të FMN-së, Weber u shpreh se disa prej fushave kryesore ku do të përqendrohet misioni do të jenë analiza dhe perspektiva e treguesve makroekonomikë, fiskalë e financiarë dhe projeksionet për to, reformat strukturore, performanca e vitit 2023, etj.
Misioni i FMN-së do të qëndrojë në Tiranë nga data 17-27 tetor dhe do të zhvillojë një seri takimesh, ndërsa në fund është parashikuar një konferencë e përbashkët për shtyp.
