Bizneset shqiptare kanë investuar jashtë vendit 126 milionë euro vetëm në 6 muajt e parë të këtij viti. Bëhet fjalë për një nivel rekord, që kundrejt të njëtës periudhë të një viti më parë rezulton 40% më i lartë.
Të dhënat janë bërë publike nga Banka e Shqipërisë. Sipas institucionit mbikëqyrës bankar, ky është edhe niveli më i lartë historik i investimeve shqiptare jashtë vendit, të paktën për periudhën e serisë statistikore të Bankës së Shqipërisë, që fillon nga viti 2008. Në pjesën më të madhe, investimet shqiptare janë kanalizuar në kontribute direkte në kapitalin e shoqërive të kontrolluara jashtë vendit.
Këto injektime kapitali përbënin më shumë se 72% e fluksit të ri të investimeve shqiptare jashtë vendit. Pjesa tjetër konsiston kryesisht në formën e huave të dhëna nga aksionerët shqiptarë për kompanitë bija të vendosura jashtë vendit.
Disa prej grupeve më të rëndësishme shqiptare të biznesit prej vitesh janë të vendosura jashtë vendit dhe në vitet e fundit kjo prani duket se po zgjerohet, edhe si pjesë strategjisë së diversifikimit të biznesit.
