Cmimet e lira kanë bërë që mallrat kineze të pushtojnë tregun shqiptar. Sipas të dhënave të Institutit të Statistikave për tregtinë e jashtme, për 7 muajt e parë të këtij viti, tre vendet me të cilat importet janë rritur ndjeshëm kundrejt një viti më parë janë Kina, Zvicra dhe Shtetet e Bashkuara të Amerikës.
“Gjatë këtij shtatëmujori, vendet me të cilët Shqipëria ka pasur uljen më të madhe të importeve, në krahasim me një vit më parë, janë: Turqia (18,2 %), Greqia (14,9 %), Italia (4,3 %), etj. Ndërsa vendet me të cilat importet kanë pasur rritjen më të madhe janë: Kina (34,5 %), Zvicra (79,5 %), SHBA (45,6 %), etj”, theksohet në raportin e INSTAT-it.
Të dhënat e detajuara nxjerrin në pah se nga Kina importohen një gamë e gjerë produktesh, duke filluar nga makineritë e deri tek veshjet dhe këpucët, duke e bërë këtë vend konkurrent të fortë kundrejt partnerëve të përhershëm kryesorë të Shqipërisë, si Italia dhe Greqia.
