Sezoni turistik dhe i nxehti/ Apel për kursim të energjisë, paralajmërim atyre që vjedhin

Temperaturat e larta dhe fluksi i sezonit veror drejt zonave turistike po krijojnë sfida për rrjetin e shpërndarjes së energjisë elektrike.

Në një konferencë të përbashkët me drejtuesit e OSHEE, ministrja Belinda Balluku garantoi furnizimin dhe gatishmërinë e grupeve në terren për të ndërhyrë për çdo problematikë.

Numri dy i qeverisë paralajmëroi edhe bizneset dhe individët që kryejnë lidhje të jashtëligjshme. “Grupet q ëndodhen në terren për të shkëputur lidhjet e paligjshme apo vjedhjet do të vazhdojnë ta bëjnë punën e tyre në mënyrë rigoroze, pavarësisht se ky është një sezon veror shumë i rëndësishëm për ekonominë shqiptare. Por kjo nuk do të thotë që të ketë abuzime. Meqë kam një hotel dhe kam turistë, mund të vjedh energji. Kjo nuk do të ndodhë. Do të ndrëpritet menjëherë. Do të merren masa dhe do të vihen gjoba”, deklaroi Balluku.

Ministrja e Energjisë iu adresua edhe qytetarëve për t’iu kërkuar të mos shpërdorojnë energjinë përgjatë këtyre ditëve të nxehta.

Aktualisht janë rreth 1,100 punonjës të dedikuar në terren vetëm për zonat turistike, me një numër të madh grupesh për kontrollin e problematikave të raportuara, por edhe për lidhjet e paligjshme.