Rritet sërish inflacioni, rënia e euros nuk frenon shtrenjtimin e ushqimeve

Inflacioni i është rikthyer rritjes në maj, pas ngadalësimit për gjashtë muaj rradhazi. Sipas të dhënave të Institutit të Statistikave, muajin e kaluar, inflacioni arriti në 4.7%, ndërkohë që në të njëjtën periudhë të një viti më parë ishte në nivelin 6.7%.

Inflacioni arriti nivelin më të lartë të tij në tetor të vitit të kaluar, kur shënoi 8.3%. Që prej asaj periudhe, ky tregues ka pësuar rënie graduale, për t”iu rikthyer rritjes muajin e kaluar. Shtrenjtimi i ushqimeve nuk është ndalur as nga zhvlerësimi i euros, që teorikisht duhet të kishte ndikuar.

INSTAT raporton se rritja vjetore e çmimeve në muajin Maj është ndikuar kryesisht nga grupi “Ushqime dhe pije joalkoolike” me +3,58 pikë përqindje, pasuar nga grupi “Mobilje, pajisje shtëpie dhe mirëmbajtje e shtëpisë” me +0,47 pikë përqindje. Çmimet e grupit “Qira, ujë, lëndë djegëse dhe energji” me +0,41 pikë përqindje. Çmimet e grupeve “Hotele, kafene dhe restorante” dhe “Mallra dhe shërbime të ndryshme” me +0,22 pikë përqindje secili. Çmimet e grupit “Pije alkoolike dhe duhan” me +0,18 pikë përqindje.

Çmimet e grupit “Argëtim dhe kulturë” me +0,16 pikë përqindje. Çmimet e grupit “Veshje dhe këpucë” me +0,15 pikë përqindje. Çmimet e grupeve “Shëndeti” dhe “Shërbimi arsimor” me +0,06 pikë përqindje secili. Çmimet e grupit “Komunikimi” kanë kontribuar me +0,04 pikë përqindje. Çmimet e grupit “Transporti” me -0,82 pikë përqindje.