LIGJET E BIZNESIT
Të enjten në seancë plenare, parlamenti pritet të miratojë reformën e pagave, pas premtimit të kryeministrit për të rritur pagën mesatare në sektorin shtetëror në 900 euro. Por, ajo që ka ndodhur, me propozim të vetë deputetëve që do të ngrenë dhe kartonët, pagat e tyre, si dhe të funksionarëve të lartë të shtetit do të rriten nga 65% deri në 98%.
Ndërkohë që për pjesën të administratës, në këtë vit të parë të reformës do të bëhet vetëm një rritje prej 7%. Ky nivel përkon pak a shumë me normën e inflacionit, çka do të thotë se bëhet fjalë jo për rritje, por thjesht për indeksim pagash. Por edhe kjo kategori është e privilegjuar krahasuar me një pjesë tjetër të popullsisë, të cilët nuk do të përfitojnë asgjë dhe që janë pensionistët dhe ata me ndihmë ekonomike.
E kjo reformë po ndodh në një kohë kur shqiptarët kanë ulur konsumin e ushqimeve dhe bizneset, nivelin e prodhimit. Për këtë çështje u fol këtë të mërkurë në A2 Business nga Aurora Sulçe.
Flobenc Dilaveri, ish zv.drejtor i Përgjithshëm i Tatimeve u shpreh me ironi, se kuptuam se sektori më prioritar është Parlamenti.
“Kuptuam që sektori më prioritar është Parlamenti. Reforma është duke filluar atje ku janë hallexhinjtë më të mëdhenj. Ajo që më pëlqeu më shumë, dëgjova dhe lexova se dhe opozita dhe pozita kanë qenë në një mendje.
Një pjesë e kauzave të opozitës, që flasin për probleme në ekonomi, për mungesë të të ardhurave në buxhet, bie kur t’i voton i pari për pagën tënde. Unë do ta quaja arritje të madhe nëse deputetët nuk do të votonin të gjithë pro.
Kemi dëgjuar deputetë që bënin donacione me paga të ulëta, pse duhet t’i rrisnin? Kjo nuk është një politik e studiuar. Deputetët e komisionit të ekonomisë duhet të kishin debatuar se ku do të gjenden të ardhurat”, deklaroi Dilaveri.
