Rënia e euros, Ministria e Financave shpjegon çfarë po ndodh me tregun

Institucionet shtetërore nuk do të ndërhyjnë në treg për të lehtësuar bizneset që preken nga rënia e euros. Ministrja e Financave dhe Ekonomisë, Delina Ibrahimaj ka deklaruar se është bërë një analizë, se cilat janë shkaqet e zhvlerësimit të monedhës europiane. Ajo ka shpjeguar se ndërhyrjet në tregun e këmbimit, që i nënshtrohet regjimit të lirë, bëhen nga Banka e Shqipërisë në bazë të situate të caktuara emergjente dhe jo për të favorizuar biznese të caktuara.

“Ne kemi një regjim të kursit fleksibël të këmbimit, ku ndërhyrjet janë shumë të limituara dhe kryhen nga Banka e Shqipërisë dhe jo nga qeveria shqiptare. Dhe janë për periudha dhe elementë emergjentë të situatave ekonomike dhe jo për mbështetje të një kategorie apo një kategorie tjetër biznesi”, u shpreh ministrja.

Ndërkaq euro e ka nisur edhe këtë javë me rënie. Sipas kursit zyrtar të Bankës së Shqipërisë, monedha europiane ka zbritur në 111.08 lekë, duke hunbur 0.04 lekë kundrejt fundit të javës së kaluar.