A ka kaluar kriza energjetike? Përgjigjet zv.ministri i Energjisë: Nuk varet nga ne

Ilir Bejtja, zëvendësministri i Energjisë, i ftuar në “A2Business” me Aurora Sulçe foli mbi krizën energjetike në vend, për të cilën u shpreh se, për aq kohë sa kriza nuk është shqiptare, kjo do të thotë që kriza nuk ka kaluar ende.

Bejtja a mund të konsiderohet e kaluar kriza energjetike?

Sa kohë që kriza nuk është shqiptare, nuk është e kaluar. Pra, nuk është një krizë shqiptare, por një krizë që është në të gjitha vendet e BE-së. Ka një zbutje të saj, sidomos në zonën e hidrokarbureve dhe për pasojë reflektohet edhe në tregun e energjisë elektrike.

Do të thotë që jemi ende në një gjendje alerti, në pritje se çfarë mund të ndodhë?

Patjetër. Në qershor fillon sezoni i thatë, ne jemi gjithmonë të ekspozuar ndaj kushteve të motit. Nëse viti do të paraqitet mesatarisht i lagësht, besoj do të kemi një situatë të favorshme. Nëse do të vazhdojë edhe vjeshta si pranvera do të thotë që do të kemi një vit të mirë, optimal.

Dhe me shtimin e voltaikëve do të kemi mundësi që 2024-a të jetë një vit krejt ndryshe, ndoshta edhe pa i ndikuar fare nga importet. Që të sqarojmë, importe kemi gjithmonë, jemi në treg si kur shesim, ashtu edhe kur blejmë. Ne do të kemi gjithmonë kërkesë dhe ofertë në treg, në të gjitha rastet nga KESH-i.