LIGJET E BIZNESIT
Rënia e euros po dëmton eksportuesit shqiptarë. Përfaqësuesit e industrisë fason japin alarmin se nëse kjo rënie vazhdon, atëherë ata rrezikojnë falimentin. Pasi ky sektor po përballet aktualisht me disa goditje, sic ëhstë mungesa e fuqisë punëtore apo edhe rritja e kostove.
Deklaratat u bënë në emisionin A2 Business të gazetares Aurora Sulçe nga Florian Zekja, anëtar i Pro Export Albania, shoqata që mbron interesat e industrisë fason.
“Biznesi shqiptar po përballet me sfida shumë të mëdha, si lufta për tregjet, problemet e energjisë, por të gjitha këto kanë dalë në plan të dytë për shkak të rënies së euros, pasi ne nuk e dimë si do të jetë e ardhmja. Ne nuk e dinë se me çfarë kursi do të bëjnë çmimet. Ne duhet të rrisim pagat, kostot shtohen dita-ditës.
Ne kemi ngritur alarmin që të marrim masa, pasi nëse vazhdojmë kështu me nisjen e sezonit turistik, ne do të jemi në kolaps total. Kemi gjithmonë më pak lekë në duar dhe e kemi jetën e pasigurt për menaxhimin e biznesit.
Ka zëra që thonë se euro mund të shkojë deri në 100 lekë. Ne nuk duam ta mendojmë dhe ta përllogaritim çmimet me një kurs të tillë. Kohët e fundit, kemi bërë edhe disa takime me shoqata të tjera eksportuese dhe kemi diskutuar për zgjidhjet. Zgjedhjet mund të vijnë me një ndërveprim me Bankën e Shqipërisë, me guvernatorin, me qeverinë, qoftë edhe me Bankën Botërore apo FMN-në. Ky është një fenomen vetëm shqiptar. Në vende të tjera ku janë klientët tanë, kursi është stabilizuar dhe ne nuk mund t’i kërkojmë klientëve tanë një rritje çmimi me 10-15 përqind.
Ne nuk mund të mendojmë një skenar B. Skenari B për ne është ai i falimentit. Nëse ne, përtej rritjes së kostove, të përballemi dhe me ndryshimin drastik të kursit, flitet vetëm për mbijetesë”, deklaroi Zekja.
