Qeveria ndryshon procedurat për kompanitë që duan të investojnë në prodhimin e energjive të rinovueshme. Në mbledhjen e fundit të Këshillit të Ministrave u miratua vendimi që detyron kompanitë e interesuara për këtë sektor që të dorëzojnë që në fazën e aplikimit dokumentacionin e tokës, qoftë kjo në pronësi apo e marrë me qira.
Në këtë mënyrë, Ministria e Infrastrukturës dhe Energjisë synon që të shmangë problemet e konstatuara deri më tani në këtë drejtim.
Pas mbledhjes së qeverisë u njoftua gjithashtu, se pranë Agjencisë së Eficiencës së Energjisë do të ngrihet një platformë elektronike për monitorimin e konsumit të energjisë, teksa të dhënat do të mund të përdoren për politika të kursimit të energjisë në të ardhmen.
