Aktiviteti i lojërave të fatit ka pasur një ecuri shumë pozitive gjatë vitit që lamë pas. Kontributi në arkën e shtetit i kësaj industrie ka kapërcyer pritshmëritë. Sipas të dhënave zyrtare nga Drejtoria e Përgjithshme e Tatimeve, gjatë vitit 2022 janë mbledhur 1.97 miliardë lekë apo rreth 17 milionë euro nga lojërat e fatit, me një rritje prej 28.5 për qind në krahasim me një vit më parë. Ndërsa në raport me planifikimin vjetor, të ardhurat janë rritur me 16 për qind.
Arkëtimet janë bërë nga tatimi i aktivitetit në kazino, ndërkohë të ardhurat pritet të rriten më tej pasi së shpejti do të rikthehen në “lojë” edhe bastet sportive “on line”, duke u formalizuar. Një nga variantet e hartuara nga Ministria e Financave dhe që ende është fazë diskutimi, përcakton se “Organizatorët e kategorisë “Baste sportive on line” do të tatohen në masën 25 % të të ardhurave bruto nga loja.
Këshilli i Ministrave përcakton me vendim masën e të ardhurave nga ky tatim e cila kalon për llogari të Ministrisë përgjegjëse për sportin si dhe mënyrën e shpenzimit të saj. Po ashtu, në draftin paraprak thuhet se “Të ardhurat e individëve nga lojërat e fatit për të gjitha kategoritë e lojërave tatohen sipas ligjit për tatimin mbi të ardhurat.
Organizatorët e lojërave të fatit janë agjentë tatimorë për deklarimin dhe pagesën e tatimit mbi të ardhurat e individëve nga lojërat e fatit, sipas procedurave të përcaktuara në ligjin për tatimin mbi të ardhurat dhe aktet nënligjore në zbatim të tij.” Po ashtu, drafti forcon rregullat për kompanitë qe do të ushtrojnë këtë aktivitet. Shuma e kapitalit për kompanitë që duan të licensohen duhet të jetë jo më pak se 1.2 miliardë lekë.
