Nuk ka të ndalur rënia e euros. Monedha europiane ka shënuar ditën e sotme nivelin më të ulët të regjitruar ndonjëherë, duke u shkëmbyer me 115.2 lekë. Sipas kursit zyrtar të Bankës së Shqipërisë, kundrejt një dite më parë, euro ka humbur 0.45 pikë, ndërsa që nga fillimi i muajit dhjetor, ajo ka rënë gjithsej me 1.65 pikë.
Sipas agjentëve të këmbimit valutor, në ditët e fundit tregu po karakterizohet nga një ofertë e bollshme për euro dhe kërkesë e pakët për monedhën europiane. Por, arsyeja që i ka dhënë një shtysë të mëtejshme rënies së euros ditën e martë ka qenë dalja më një kurs shumë të ulët nga njëra prej bankave të sistemit.
Sipas agjentëve, banka në fjalë ka shitur sasi të mëdha valute për nevoja të klientëve ose për të mbyllur një pozicion të saj. Operacione të tilla kanë një efekt edhe më të fortë në periudha kur kursi ka një tendencë të qartë në një kah të caktuar, sepse forcon më tej pritshmëritë e aktorëve në të njëjtin drejtim, në këtë rast, për nënçmimin e mëtejshëm të Euros.
Agjentët mendojnë se rënia e euros mund të vazhdojë më tej në pjesën e mbetur të dhjetorit, edhe për shkak të rritjes sezonale të ofertës valutore. Në rast se rënia e saj do të vijojë me ritme të shpejta, atëherë i takon Bankës së Shqipërisë që të ndërhyjë në treg për të vendosur balancat në kursin e këmbimit.
