Apeli i qeverisë, më 25 nëntor ankandi i bonove të thesarit

Pas thirrjes së kryeministrit për qytetarët që të investonin në letrat me vlerë të qeverisë, mësohet se më datë 25 nëntor do të zhvillohen ankandet e bonove të thesarit 6 dhe 12 mujore. Lajmi është bërë i ditur nga ministrja e Financave dhe Ekonomisë, Delina Ibrahimaj në facebook.

“Bëhu pjesë e ankandit! Përfito norma të larta dhe investo me risk ZERO. Individët pjesëmarrës në ankand duhet të kryejnë të gjitha veprimet (bankare, operacionale) në sportelet e institucioneve financiare bankare të autorizuara nga AMF minimumi 2 ditë pune para datës së zhvillimit të ankandit”, thekson ministrja.

Kjo është hera e parë që qeveria i bën thirrje qytetarëve që të investojnë në letrat me vlerë të saj, interesat e të cilave janë rritur pas vendimeve të vazhdueshme të Bankës së Shipërisë për të rritur normën bazë të interesit për lekun.

Në ankandin e fundit, interesat e bonove 12-mujore arritën në 5.74%, ndërsa interesat e bonove 6-mujore në 3.83%.