Të shpërfillur nga qeveria, studentët kërkojnë ndihmë financiare

Studentët kanë shprehur irritimin e tyre ndaj qeverisë, që nuk i përfshiu si kategori për të përfituar ndihmë në Paketën e dytë të Rezistencës Sociale, prezantuar një ditë më parë nga kryeministri. Organizatat studentore kanë protestuar përpara kryeministrisë, duke kërkuar mbështetje financiare për studentët, duke sjellë si shembull rastin e Kosovës.

“Edhe pse një shtet i vogël me më pak shpenzime për studentët, Kosova i përfshiu në paketën e antikrizës duke vendosur shpërndarjen e 100 eurove. Në vendin tonë kjo gjë nuk bëhet. Mbi të gjitha kemi një kartë student që ofron shërbime që për ne nuk kanë vlerë dhe nuk plotëson nevojat tona. Të vihet në funksion  karta e studentit siç duhet. Qiratë nga ana tjetër janë të papërballueshme teksa shohim se edhe në Astir një zonë e largët nga universitetet qiratë janë mbi 300 euro. Për të mos folur më tej për tarifat e masterit ku një master shkon deri në 1 milion e 700 mijë lekë”, deklaroi Gevio Tabaku, aktivist.

Teksa universitetet fillojnë në mes të tetorit studentët kërkojnë që qeveria të marrë një vendim përpara vitit akademik. Në shenjë simbolike, ata vendosën në murin e Kryeministrisë edhe një çmim “Guinness” dedikuar kryeministrit Rama si shenjë pakënaqësie ndaj politikave qeveritare për studentët dhe të rinjtë në përgjithësi.