42 lekë për kilovat orë? Drejtori i KESH shpjegon si doli çmimi për konsumin mbi 800 kWh

Një ditë më parë, qeveria njoftoi se çmimi i energjisë për konsumin mbi 800 kWh në muaj do të bëhet 42 lekë për kilovat. Por si ka dalë kjo shifër, që kryeministri e përcaktoi si çmim tregu? Drejtori i Përgjithshëm i KESH, Ergys Verdho ka shpjeguar se formula vjen nga mesatarja e bursës në një vit kalendarik. Ai deklaron se aktualisht nevojat e vendit për energji po plotësohen 70% nga prodhimi vendas nga kaskada e lumit Drin dhe 30% nga importi.

“Për momentin kemi një kuotë, 460 gigavat me një kuotë 268, një kuotë historike për një vit të thatë, dhe kjo është bërë e mundur falë importit, që ka zbutur uljen e kuotës në hidrocentralet tona. Kriza ka filluar një vit me parë, e nënvizoj sepse disa thonë se Shqipëria nuk është e përfshirë nga kriza.  Ka patur një tentativë e Rusisë për të anashkaluar Ukrainën për të ndërtuar Nord Stream 3, që nuk u miratua nga Gjermania, dhe nga aty filluan sanksionet. Jemi në kulmin e krizës, ku nuk merret as 16% e gazit të dikurshëm nga Rusia”, ka deklaruar kreu i KESH.

Ai ka shpjeguar se aktualisht vendi nuk ka të gjitha kapacitetet për t’u përballur me nevojën për energji, por situata pritet të ndryshojë.