LIGJET E BIZNESIT
Duke nisur nga 1 korriku pagat e infermierëve, mësuesve të sistemit parauniversitar dhe mjekëve u rritën me 6%.
Vendimi u mor në mbledhjen e Këshillit të Ministrave.
Gjithashtu ai u botua dhe në fletoren zyrtare.
Mësohet se nga miratimi i këtij vendimi të Ministrisë së Arsimit, përfitojnë rreth 30200 mësues, rreth 790 punonjës psikologë, punonjës socialë dhe oficerë sigurie, rreth 1300 punonjës të arsimit profesional në varësi të Ministrisë së Financave dhe Ekonomisë, si dhe rreth 4410 punonjës të institucioneve të arsimit parashkollor, qendrave kulturore të fëmijëve dhe të konvikteve shkollore, në varësi të njësive të vetëqeverisjes vendore. Sakaq në sektorin e mjekësisë nga rritja e pagave me 6% përfitojnë mbi 19 mijë punonjës të shëndetësisë, nga urgjenca kombëtare, në shërbimin e shëndetit publik, në qendrat e kujdesit parësor dhe në shërbimin spitalor.
Në vendimin po ashtu bëhet me dije se ka edhe një shpërblim financiar për mjekët që kanë përfunduar specializimin dhe e ushtrojnë profesionin e tyre larg vendbanimit. Kështu, Qeveria shqiptare ka miratuar edhe një shpërblim financiar në masën 15 mijë lek në muaj për të gjithë ata mjekë që përfundojnë specializimit dhe në bazë të kontratave me Ministrinë e Shëndetësisë e ushtrojnë profesionin e tyre larg vendbanimit, në spitalet rajonale, do të përfitojnë këtë shpërblim financiar mbi pagën. Nga ky shpërblim do të përfitojnë rreth 300 mjekë, të cilët kanë përfunduar specializimin dhe do të përfundojnë specializimet dhe do të atashohen pranë spitaleve rajonale për të ushtruar profesionin e tyre në një periudhë tre vjeçare, sipas detyrimit të përfshirë në kontratën me Ministrinë e Shëndetësisë dhe Mbrojtjes Sociale. Rritje page po me këtë përqindje ka pasur për të gjithë punonjësit e sistemit arsimor parauniversitar.
Kategoritë që përfitojnë nga rritja e pagave
Kështu, në vendim, thuhet se për kategorinë titullarët e institucioni në QSU “Nënë Tereza”, në spitalin rajonal“Memorial” shtesa në pagë është 118.600. Zëvendëstitullar institucioni në spitalet rajonale/psikiatrike/bashkiake, drejtor drejtorie në QSU “Nënë Tereza”, drejtor drejtorie në Spitalin rajonal Memorial Fier shtesa është 82.000. Drejtor drejtorie në Spitalin Universitar të Sëmundjeve të Mushkërive “Shefqet Ndroqi” Tiranë; Spitalin Universitar Obsetrik Gjinekologjik nr. 1, nr. 2 Tiranë; Spitalin Universitar të Traumës Tiranë. Përgjegjës sektori biomedikal shtesa në pagë është 74.000. për kategorinë Administrator për Polin e administrimit të integruar në QSU “Nënë Tereza” shtesa është 65.000. Për përgjegjës sektori në sektorët e përmbajtjes në spitalet universitare dhe në QKTGJ dhe përgjegjës sektori në sektorët e përmbajtjes në spitalin rajonal “Memorial” Fier shtesa në pagë është 61.000, ndërsa për kategorinë përgjegjës sektori në sektorët mbështetës është 59.000. Po ashtu, për kategorinë Shef i Laboratorit Klinik Biokimik shef Reparti Kimioterapi, shef Laboratori, shef i Qendrës së Diagnozës Molekulare shtesa është 95.720. Shef Reparti Rrezatimi shtesa është 95.720, ndërsa për Shef sektori mjekësor, shef farmacie është 87.410. Përgjegjës i Sektorit të Laboratorëve/Shef i Bankës së Gjakut/Shef i Sektorit të Mbledhjes dhe Përpunimit të Gjakut në Qendrën Kombëtare të Transfuzionit të Gjakut, shtesa është 87.410. për mjek stomatolog, biolog, kimist, fizikan në preparator është 84.600, ndërsa për Kryeinfermier/kryevaksinator shtesa në pagë është 56.390.
