Dy profesorët e njohur, ekspertët e ekonomisë, Akademik, Prof.Dr, Anastas Angjeli dhe Akademik Prof.Dr, Adrian Civici, promovuan sot Librin “Kriza e tretë”. Në nje ceremoni me të ftuar personalitete të njohur nga fusha e ekonomisë, politikës, Akademia e Shkencës libri u vlerësua për përgjigjet që i jep një sërë pikpyetjesh për atë që na pret në të ardhmen.
Në panel ishin të pranishëm gjithashtu Ministrja e Financave dhe Ekonomisë, Delina Ibrahimaj dhe Guvernatori i Bankës së Shqipërisë, Genc Sejko, të cilët vlerësuan librin. Lufta në Ukrainë dhe reagimet ndërkombëtare ndaj tij, i hapën rrugën një krize të re me të cilën duhej të përballej bota, natyrisht edhe Shqipëria nuk mund ti anashkalonte efektet tejet negative ekonomike, financiare e sociale të saj. Kriza energjitike, ajo e sigurisë ushqimore, inflacioni i lartë, rritja e çmimit të energjisë elektrike, naftës, gazit, ushqimeve, lëndëve të para, u bënë kryefjala e shqetësimeve globale.
Skena gjeopolitike e gjeoekonomike ndryshoi, kriza energjitike dhe e sigurisë ushqimore janë prezente, inflacioni i lartë dhe rritja galopante çmimeve të produkteve ushqimore dhe lëndëve të para po kërcënojnë ekonominë dhe bisneset, tregjet janë tronditur thellë dhe po riformatohen, globalizimi po “ngushtohet”.
Ky libër i tretë, në serinë prej tre vëllimesh, i dedikohet pikërisht, ndjekjes ditë pas dite e javë pas jave problematikës së kësaj “krize të tretë” që po përballojmë. Ai i jep përgjigje pikërisht pikpyetjeteve për këto shqetësime globale.
