Presidenti Meta ka bërë sërish ditën e sotme apel për qetësi dhe rikthim në normalitet për të gjitha palët politike në vend.
Gjatë një takimi me Ministrin e Punëve të Jashtme dhe Tregtisë të Hungarisë, Péter Szijjártó, kreu i shtetit foli edhe për situatën politike në vend, duke thënë se dalja nga kriza e do e shtynte vendin drejt rrugës në prespektivën europiane.
“Vlerësoj marrëdhëniet tradicionalisht shumë të mira ndërmjet Shqipërisë dhe Hungarisë. Çmoj mbështetjen e sinqertë të Hungarisë në procesin e integrimit europian. Me rëndësi zbatimi i të gjitha prioriteteve që kushtëzojnë një vendim pozitiv të Këshillit Evropian . Palët të reflektojnë sa më parë për dialog dhe zgjidhjen e krizës.
Shqipëria të rikthehet në normalitetin e respektimit të shtetit ligjor. Çdo veprim drejt rrugës së paligjshmërisë dhe të konfliktit, e nxjerr Shqipërinë nga perspektiva e saj europiane. Aktorët e brendshëm ose të jashtëm që i kontribuojnë këtij skenari, do të mbajnë përgjegjësi përpara popullit shqiptar”, theksoi Presidenti Meta.
