Gjendje e stabilizuar, nuk ka ndonjë përkeqësim, por as përmirësim të dukshëm për nënën e aksidentuar para tre ditësh në Tiranë teksa po ecte me bashkëshortin dhe foshnjën e saj 3 muajshe te vijat e bardha. Bashkëshorti duket se ka një përmirësim të lehtë.
Autori i aksidentit, 39-vjeçari me emrin Ajas Sulejmani u largua nga vendngjarja pas aksidentit dhe u arrestua pas 3 orësh nga policia në një spital privat. Të mërkurën, pritet që ai të dalë para gjykatës për masën e sigurisë.
Sakaq, gjendja e çiftit është e stabilizuar me diagnozë politraumë, sipas Balkanweb.
“Gruaja ndodhet në gjendje më të rëndë. Nuk ka pasur përkeqësim dhe as përmirësim. Dje ka lënë spitalin dhe foshnja e çiftit, e cila ka pasur vetëm një dëmtim të lehtë të syrit pa pasoja. Çifti ka dalë nga reanimacioni dhe ndodhen në një dhomë së bashku dhe foshnja do të qëndrojë me ta. Gruaja është përmendur vetëm ditën djeshme dhe ka kërkuar vajzën e vogël”, tha gazetari Çelmeta.
39-vjeçari Sulejmani rezultoi i shoqëruar disa herë nga policia për thyerje të rregullave të qarkullimit, ka pasur gjoba, por jo pezullim të patentës.
