LIGJET E BIZNESIT
Tejet transparent dhe që nuk ka ndodhur kurrë në Partinë Demokratike, e quajti Albana Vokshi procesin e votimit të zgjedhjes së kryetarit të Këshillit Kombëtar, dje.
Në një konferencë për shtyp, Vokshi, njëherësh edhe anëtare e Komisionit të Rithemelimit tha se procesi i votimit dhe numërimit ishte i gjithë para kamerave.
“Çdo votë është numëruar në mënyrë transparente. Për ne vota është e shenjtë dhe nuk do ta lëmë që ta cënojë askush. Vullneti ynë për transparencë dhe për ta bërë procesin publik para kamerave është tregues i mirë për ecjen para të PD.
I gjithë procesi ka qenë live. Numëruesit kanë numëruar edhe me zë. Ka pasur kamera që kanë filmuar çdo fletë votimi. Është bërë numërimi i fletëve të ndara, për Elenën dhe Edin. Kaq transparente ka qenë. Çdo gjë live.”, tha ajo.
Midis të tjerash, Vokshi foli edhe për një video që ka qarkulluar në rrjetet sociale, për të cilën tha se doli jashtë kontekstit.
“Ka qenë dashakeqësi një video e dalë jashtë kontekstit. Unë gjej rastin ta shpjegoj në respekt të publikut shqiptar. Në videon e shpërndarë mbrëmë është rreth fletëve totale të votimit që janë në vënë në dispozicion të dy tavolinave. Është një numër total i parëndësishëm. Nuk ishin në dijeni për numrin total të prodhuar. Diskutimi po bëhej për këto fletë. Kjo nuk e cenon procesin që mbetet transparent. PD është e vendosur në vullnetin e saj për transparencë të plotë”, sqaroi ajo.
