LIGJET E BIZNESIT
Shefi i NATO Jens Stoltenberg ka bërë një paralajmërim të fortë përsa i përket luftës në Ukrainë.
Sipas tij, situata është shumë e paparashikueshme.
Stoltenberg shtoi se aleanca është e gatshme të mbështesë Ukrainën kundër pushtimit rus në një luftë që “mund të zvarritet dhe të zgjasë me muaj e vite”.
“Ne do të vazhdojmë të ushtrojmë presion maksimal mbi presidentin rus, Vladimir Putin për t’i dhënë fund luftës duke vendosur sanksione, duke ofruar mbështetje ekonomike, por edhe mbështetje ushtarake për Ukrainën, dhe ne duhet të jemi të përgatitur për një afat të gjatë”, tha Stoltenberg gjatë një Samiti të Rinisë së NATO-s që po zhvillohet në Bruksel, raporton CNN.
“Është një situatë shumë e paparashikueshme dhe e brishtë në Ukrainë. Por ekziston absolutisht mundësia që kjo luftë të zvarritet dhe të zgjasë me muaj e vite”, vazhdoi ai.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Stoltenberg tha gjithashtu se aleatët e NATO-s po përgatiten të ndihmojnë Kievin të avancojë nga “pajisjet e vjetra të epokës sovjetike drejt armëve dhe sistemeve më moderne standarde”, por shtoi se kjo “do të kërkojë më shumë trajnim”.
Shtetet e Bashkuara dhe disa vende evropiane, duke përfshirë Holandën dhe Francën, kanë njoftuar së fundmi se do të furnizojnë Ukrainën me obus, armë me rreze të gjatë, për të ndihmuar në mbrojtjen kundër Rusisë.
Gjermania ka thënë se do të furnizojë Ukrainën me tanke kundërajrore, pasi ajo përpiqet të shmangë kritikat se qeveria ka qenë e ngadaltë në ofrimin e pajisjeve ushtarake për vendin e shkatërruar nga lufta.
Të mërkurën, Ministrja e Jashtme gjermane Annalena Baerbock tha se ata do të mbështesin ushtrinë ukrainase duke ofruar “stërvitje dhe mirëmbajtje”.
Baerbock shtoi se Gjermania kishte zgjedhur të mos i bënte publike të gjitha armët që kishte dërguar më parë në Ukrainë. “Ne kemi furnizuar me armë antitank, Stingers dhe shumë armë të tjera për të cilat nuk kemi folur në publik”, tha ministri i Jashtëm.
Sekretarja e Jashtme britanike Liz Truss foli për mbështetje që Mbretëria e Bashkuar të dërgojë avionë luftarakë dhe armë të tjera të rënda në një fjalim kryesor të mërkurën.
“Armë të rënda, tanke, aeroplanë – duke gërmuar thellë në inventarët tanë, duke rritur prodhimin. Ne duhet t’i bëjmë të gjitha këto”, tha Truss.
“Sanksionet tona tashmë e kanë parë Rusinë duke u përballur me mospagimin e parë të borxhit të jashtëm për një shekull. Ne duhet të shkojmë më tej”, shtoi ajo.
