Kryetarja e Lëvizjes Socialiste për Integrim Monika Kryemadhi ka folur sot nga Kuvendi për të rinjtë.
Sipas saj, ata e kanë shumë të vështirë që të futen në politikë në Shqipëri.
Kryemadhi shtoi se të rinjtë detyrohen të shkojnë në Angli për t’u bërë rojtarë të shtëpive të barit, ndërsa vajza eskortë të kriminelëve të drogës.
“Për tu rikthyer tek ministrja e Rinisë, Buzhaqi, më fal për mbiemrin por duhet të kuptosh nje gjë e nderuar që një i ri të kandidojë për deputet në bazë të sondazheve dhe shoqatave që janë të lidhura me qeverinë, një partie politike i kushton 100 euro një votë. Nëse një i ri duhet të bëhet deputet, i duhet një milionë euro për të hyrë parlament. Një ri shqiptar sot nuk ka as 200 euro në xhep por i hipin kamionëve për të qenë rojtarë në shtëpitë e barit në Angli apo Spanjë apo vajzat shqiptarë për tu bërë eskorta të kriminelëve të drogës në Shqipëri”, u shpreh Kryemadhi.
Kryemadhi foli edhe për aferën e inceneratorëve: “Pastaj vijmë tek zemra e Akilit. Ne kemi inceneneratorët. Deri më sot qeveria ka dhënë 100 mln euro nga djegia e plehrave dhe nuk është prodhuar asgjë. A është kjo një kambanë për SPAK që ta kthejë vëmendjen aty ku është çështja? Do ishte mirë të zbardhnim skemën e inceneratorëve”.
