Papa Françesku kërkoi falje ditën e mërkurë për qëndrimin ulur gjatë audiencës së tij javore, duke fajësuar një problem në gju që e mundonte dhe e kishte detyruar të anulonte disa aktivitete ditët e fundit.
“Kërkoj falje që do t’ju përshëndes ulur, sepse ky gju nuk e ka mbaruar shërimin dhe nuk mund të qëndroj në këmbë për një kohë të gjatë”, tha ai pas audiencës në Sheshin e Shën Pjetrit.
“Më falni për këtë, faleminderit”, i tha Papa 85-vjeçar turmës së mbledhur, që duartrokiti ndjesën e tij.
Papa e kishte boshatisur axhendën të martën për shkak të dhimbjes në gjurin e djathtë sikurse anuloi angazhimet të premten e kaluar për t’iu nënshtruar kontrolleve mjekësore.
Ai duket se ka probleme me ecjen, sepse i ndodhi edhe në shkurt dhe mars, megjithëse kaloi 2 ditë duke vizituar shtetin ishullor mesdhetar të Maltës, ashtu siç ishte planifikuar në fillim të këtij muaji.
Papa i tha gazetës argjentinase La Nacion një javë më parë se kishte një ligament të këputur në gju, të cilin po e kuronte duke i vendosur akull dhe pirë qetësues.
