2 të moshuar janë arrestuar nga Policia e Tropojës, pasi akuzohen se kanë ndërtuar dy bujtina pa leje brenda zonës së mbrojtur në Luginën e Valbonës.
Në vijim të punës për parandalimin, evidentimin si dhe ndëshkimin e veprimtarisë penale në fushën e ndërtimeve pa leje, veçanërisht brenda vijës së verdhë në zonat urbane dhe në ato të mbrojtura, shërbimet e Komisariatit të Policisë Tropojë, arrestuan në flagrancë dy shtetas.
Prek Jubani, 64 vjeç, banues në fshatin Rrogam, pasi kishte ndërtuar një objekt pa leje, në vendin e quajtur “Rrëzë Brijës”, që është zonë e mbrojtur.
Sali Selimaj, 75 vjeç, banues në fshatin Valbonë, pasi kishte ndërtuar një objekt pa leje, në vendin e quajtur “Bujtina Jezerca”, në fshatin Valbonë, që është zonë e mbrojtur.
Ata akuzohen për veprën penale “Ndërtimi i paligjshëm”. Materialet në ngarkim të këtyre shtetasve i kaluan Prokurorisë pranë Gjykatës së Rrethit Gjyqësor Tropojë, për veprën penale “Ndërtimi i paligjshëm”.
