Shitja e Milanit te kompania “Investcorp” bëhet gjithnjë e më e mundshme dhe konfirmimi vjen në rrugë zyrtare edhe një nga burim i papritur, Ambasada e Bahrejnit në Mbretërinë e Bashkuar, ka bërë të ditur nëpërmjet adresës në Twitter për “negociatat ekskluzive” me fondin “Elliot” që ka në pronësi kuqezinjtë.
“Fondi i menaxhimit të aseteve me qendër në Bahrejn, Investcorp, ka nisur negociatat ekskluzive për blerjen e klubit të Serisë A italiane, AC Milan për 1,1 miliardë dollarë. Investcorp u themelua në vitin 1982, ofron një portofol të gjerë dhe global investimesh dhe menaxhon mbi 42 miliardë dollarë në asete në të gjithë globin”, shkruhej në postimin e Ambasadës.
Kështu, duket se zyrtarizohen edhe shifrat për shitjen e kuqezinjve që mendohej se ishin në fillim 1,1 miliard euro, e që tashmë është specifikuar se janë 1,1 miliard dollarë. Gjithsesi, një shifër shumë më e lartë se ajo që ka shpenzuar “Elliot” për të blerë aksionet e Milanit apo që ka investuar në vitet e fundit në këtë skuadër. Tani mbetet të mësohet nëse gjithçka do të finalizohet në maj siç përflitet në mediat ndërkombëtare prej disa ditësh.
PANORAMASPORT.AL
