“Politikani që meriton respekt” Bujar Leskaj uron Pandeli Majkon për rikthimin në Kuvend

Deputeti i PD Bujar Leskaj i ka uruar mirëseardhjen kolegut të tij socialist Pandeli Majko.

Teksa mori fjalën në Kuvend, ai u shpreh sot se Majko meriton respekt si politikan, dhe shtoi se është i bindur se nuk do të jetë në “grupin parlamentar të kanabisit”.

“Politikan që meriton respekt. Kam bindjen se zoti Majko nuk do të jetë te grupi parlamentar i kanabisit”, u shpreh Leskaj, ndërsa deputeti në kampin kundërshtar e priti me buzëqeshje.

Pandeli Majko u rikthye pas një viti në Kuvend, pasi zëvendësoi mandatin e lënë nga ish-deputeti i PS, Alqi Bllako. Ky i fundit ndodhet në burg, i akuzuar si i përfshirë në aferën e inceneratorëve. Sakaq, Majko nuk mundi të fitonte mandatin, pasi ndodhej i 19-ti në listën e PS, duke mbetur jashtë.