Djali i ish-deputetit socialist Aqif Rakipi, i cili u shpall “non-grata” ditën e hënë nga Departamenti Amerikan i Shtetit, ka fajësuar ish-kryetarin e Partisë Demokratike Lulzim Basha.
Duke folur nga foltorja e Kuvendit, deputeti Ornaldo Rakipi tha se babai i tij është i pastër, por se vendimi i DASH ka ardhur si pasojë e deklaratave të pabazë të bërë në drejtim të familjes së tij nga ish-kryedemokrati.
Ai shtoi se ai dhe familja e tij e vlerësojnë administratën e SHBA e cila u ka dhënë mundësi apelimi, duke shtuar se familja Rakipi ka vendosur të apelojë vendimin.
“Nuk ka detyrim më të madh sa ky që ta justifikoj këtë besim bujar, dua të sqaroj qytetarët sa i përket aktit të DASH, im atë po ndërmerr çdo hap për të marrë drejtësi, vlerësojmë ambasadën amerikane, por vendimi i tyre ka lënë mundësi apelimi.
Kam një fjalë për Lulzim Bashësn, mos mallko suksesin tjetër, por politika është takime me njerëzit, prandaj ke dështuar se nuk arritje që të marrësh besimin e njerëzve se je fals dhe je materialist, kur gjendesh atyre në ditë të vështira, kur kanë një problem, kur nuk i dëgjon kush, babi im bëhet copash për të ndihmua një njeri në nevojë, babai im ndryshe nga ti ka burrni. Sa për akuzat ju ftoj ju, mediat, të hetoj aktivitetin tim, që nga momenti i angazhimi deri tani, nuk do humb asnjë sekondë, do e justifikojë besimin e shqiptarëve”, deklaroi Ornaldo Rakipi.
