Një tjetër “shtëpi bari” është goditur nga Policia në Krujë, një fenomen që tanimë është bërë masiv në vend. Katër persona kanë rënë në pranga, ndërsa tre të tjerë janë shpallur në kërkim.
Efektivët kishin marrë informacione se në lagjen “Abaze”, në qytetin e Krujës, në një magazinë kultivoheshin bimë narkotike. Gjatë kontrollit në ambientin rreth 400 metra katror, janë gjetur dhe sekuestruar në cilësinë e provës materiale 700 bimë të dyshuara narkotike cannabis sativa të kultivuara në vazo.
Këto bimë rriteshin me anë të llambave si dhe pajisjeve të tjera, që furnizoheshin përmes një lidhjeje të paligjshme të energjisë elektrike. Si rezultat i operacionit u arrestuan në flagrancë shtetasit:
- Gjon Gazulli, 23 vjeç, banues në Shkodër dhe Gojart Pelivani, 18 vjeç, banues në Krujë, të cilët janë kapur në ambientet e magazinës;
- Ardian Hysa, 22 vjeç, banues në Krujë, me detyrë elektricist pranë OSHEE-së dhe Lulzim Mançe, 31 vjeç, banues në Fushë Krujë, me detyrë lexues i aparatit matës, pranë OSHEE-së, për veprën penale “Shpërdorimi i detyrës”.
Gjithashtu u bë shpallja në kërkim e shtetasve:
- Velidian Broca, 38 vjeç, banues në Krujë, pronari i banesës;
- Dashamir Vathi, 32 vjeç dhe Ledian Vathi, 31 vjeç, banues në Krujë (vëllezër), bashkëpunëtorë me shtetasin Velidian Broca.
Në cilësinë e provës materiale janë sekuestruar 700 bimë të dyshuara narkotike cannabis sativa dhe pajisje të ndryshme elektrike të cilat shërbenin për kultivimin e bimëve narkotike në ambiente të mbyllura.
Në drejtimim e Prokurorisë vijon puna për dokumentimin e plotë të ngjarjes, identifikimin dhe kapjen e autorëve të tjerë të përfshirë.
Materialet iu referuan Prokurorisë pranë Gjykatës së Rrethit Gjyqësor Krujë, për veprën penale “Kultivimi i bimëve narkotike”, kryer në bashkëpunim, “Vjedhja e energjisë elektrike” dhe “Shpërdorimi i detyrës”.
