“Nuk është i mirëpritur” Zelensky nuk pranon të presë presidentin e Gjermanisë në Kiev

Presidenti i Ukrainës Volodmyr Zelensky ka refuzuar të presë në Kiev homologun gjerman Frank-Walter Steinmeier.

Ky i fundit kishte planifikuar një vizitë në Ukrainë, në vendin që prej afro dy muajsh po përballet me luftën. Mirëpo Zelensky nuk e ka mirëpritur.

Sipas gazetës gjermane Bild, Steinmeier me sa duket donte të udhëtonte për në Kiev të mërkurën. Megjithatë, presidenti ukrainas Volodymyr Zelensky refuzoi vizitën e Steinmeier, sipas “Bild”.

Arsyeja për këtë janë marrëdhëniet e ngushta mes Presidentit Federal dhe Rusisë në vitet e fundit. Mbështetja e Steinmeier për tubacionin e diskutueshëm të gazit Nord Stream 2 ishte gjithashtu një arsye. “Ne të gjithë i dimë lidhjet e ngushta të Steinmeier me Rusinë, të cilat u formuan gjithashtu nga formula Steinmeier. Ai nuk është i mirëpritur në Kiev për momentin. Do të shohim nëse kjo do të ndryshojë përsëri”, citoi gazeta të ketë thënë një diplomat ukrainas.

Në një konferencë për shtyp të martën pasdite me presidentin e Polonisë Andrzej Duda, Steinmeier nuk iu përgjigj pyetjes për një udhëtim të mundshëm në Ukrainë.