Ekspertët kanë deklaruar se e vetmja mundësi që i mbetej pilotit të kompanisë së China Eastern Airlines për të shmangur përplasjen, ishin 40 sekonda kohë, por ai nuk ia doli dot.
Të ndihmuar dhe nga specialist amerikanë, hetuesit kinezë po përpiqen të kuptojnë se çfarë ndodhi me Boingun 737 që u rrëzua pikiatë një ditë më parë duke i marrë jetën të 132 personave në bord, pa u lënë asnjë mundësi shpëtimi.
Avioni i nisur nga qyteti kinez, Kunming për në Guangzhou, u përplas në një zonë malore te provincës Guanxi. Presidenti kinez, Xi Jinping urdhëroi hetim të plotë. Mediet lokale thonë se ekipet e shpëtimit kanë identifikuar vendin ku është përplasur aeroplani dhe aty kanë gjetur valixhe, kuleta dhe kartela identifikimi të pasagjerëve.
Avioni është rrëzuar me një shpejtësi prej 9.400 metrash në minutë, në mënyrë gati plotësisht vertikale. Pikërisht nga mënyra sesi ka rënë mjeti, kanë lindur dyshime nëse bëhet vërtet fjalë thjesht për një aksident tragjik, apo pas ngjarjes së rëndë qëndron një akt i qëllimshëm. Të dhënat e radarëve tregojnë se avioni ka qenë duke lëvizur normalisht, kur papritur, në një moment të caktuar nis rënien pikiatë, një dinamikë lëvizjeje kjo e panatyrshme sipas ekspertëve.
