Kryetari i Partisë Demokratike Lulzim Basha ka folur pas dëshmisë së dhënë në SPAK për prokurorët belgë në lidhje me çështjen e “Toyota Yaris”.
Ai u shpreh se vetë së bashku me forcën politike që përfaqëson, do të jenë në dispozicion të drejtësisë, për të goditur lidhjet e krimit të organizuar me politikën.
Pyetje: Cilat ishin interesat e prokurorëve belgë?
Basha: Kam kënaqësinë që të jem përsëri në praninë e përfaqësuesve të drejtësisë belge, të cilët kanë konfirmuar edhe një herë të vërtetën dhe kanë hedhur poshtë gënjeshtrat. Çështja në Belgjikë nuk është mbyllur, siç ka ndodhur me çështjen këtu. Paratë mbeten të konfiskuara, drejtësia belge është e vendosur që t’i shkojë drejtësisë deri në fund.
Për herë të dytë dhe sa herë të jetë e nevojshme do bashkëpunoj me drejtësinë belge, me drejtësinë e çdo vendi partner, në luftën kundër krimit të organizuar dhe në veçanti për lidhjet e krimit të organizuar me politikën që po shkatërron ditë për ditë Shqipërinë dhe mirëqenien e shqiptarëve. E bëj këtë me vetëdijen se ky është një mision që më përket jo vetëm mua por edhe PD-së, në emër të gjithë shqiptarëve.
Përmasat e bashkëpunimit të krimit të organizuar me politikën në Shqipëri janë unike dhe janë arsyeja kryesore pse shqiptarët janë më të varfër dhe të palirë. Ndaj një gjë dua t’i siguroj sot shqiptarët unë dhe PD jo vetëm jemi në dispozicion të drejtësisë belge në këtë rast, por të drejtësisë në përgjithësi, por do vazhdojmë të jemi proaktiv në luftën tonë kundër korrupsionit, kundër krimit të organizuar, lidhjeve të krimit me politikën, duan apo nuk duan të dyshuarit, të pandehurit, të korruptuarit, non gratat e shpallur apo të pashpallur.
