LIGJET E BIZNESIT
Në kuadër të situatës politike që po kalon Shqipëria, ambasadori gjerman në Tiranë Peter Zingraf ka dalë me një mesazh të qartë.
Ai ka deklaruar se vendit i duhet një opozitë e fortë korigjuese, dhe ka apeluar për zgjidhjen e problemeve në mënyrë paqësore.
Në Ditën Ndërkombëtare për të Drejtat e Njeriut, përmes një mesazhi ambasadori Zingraf, thekson se Gjermania angazhohet t’i mbrojë këto të drejta në mbarë botën.
Që të drejtat e njeriut të mund të garantohen për të gjithë, Zingraf thotë se nevojitet një shtet i qëndrueshëm. Ai shprehet se shtetet demokratike kanë nevojë dhe për një shoqëri të hapur dhe një opozitë të fortë.
“Të drejtat e njeriut janë universale dhe të panegociueshme. Ne angazhohemi për t‘i mbrojtur këto të drejta në mbarë botën. Kjo është një përgjegjësi, e cila del nga kapitulli i errët i historisë gjermane. Kjo përgjegjësi është sot një pjesë e vetëkuptueshme e politikës sonë të jashtme. Që të drejtat e njeriut të mund të garantohen për të gjithë, nevojitet një shtet i qëndrueshëm, një kornizë politike që respekton llogaridhënien ndaj qytetareve dhe qytetarëve të saj, vepron me transparencë si dhe mbron të drejtat e tyre.
Për këtë arsye ne angazhohemi bashkërisht me partnerët tanë evropianë, brenda dhe jashtë Bashkimit Evropian, për strukturat demokratike dhe luftën kundër korrupsionit. Por shtetet demokratike kanë nevojë dhe për një shoqëri të hapur dhe një opozitë të fortë si korrigjues. Prandaj ne jemi duke monitoruar me vëmendje situatën aktuale. Është e rëndësishme që të gjitha partitë të përfshihen në mënyrë konstruktive në punën parlamentare dhe të punojnë për zgjidhjen e problemeve paqësisht dhe brenda kuadrit të strukturave ligjore”, shprehet Zingraf.
