Në gjykatën e Apelit të Tiranës, procesi gjyqësor ndaj dy të pandehurve për vrasjen e Agim Bucit dhe plagosjen e bashkëshortes në sy të djalit të mitur, ka marrë një tjetër rrjedhe.
I dënuari me burgim të përjetshëm për krimin e rëndë, Vladimir Kurti i tha trupës gjykuese se vrasjen e kreu kundrejt pagesës dhe jo për grabitje.
Ai pretendon se urdhërues i ekzekutimit është Albert Zaja, i arrestuar së fundmi si vrasës me pagesë i Shkëlzen Kastratit në Fier.
I dënuari përjetë shprehet se armën ja kishte vënë në dispozicion Zaja dhe i kishte dhënë edhe shumën prej 1 mijë eurosh, ndërsa 30 mijë euro do tja paguante pasi të kryente krimin, por nuk bën me dije motivin e ngjarjes. Më tej i dënuari përjetë shpjegon se armën e krimit ia ktheu po Zajës, e për këtë arsye ajo nuk gjendet, ndonëse pas vrasjes së Agim Bucit në Kamzë, policia devijoi lumin e Tërkuzit, pasi kishte dyshime se ishte hedhur aty.
Vladimir Kurti shpjegoi më tej, se nuk tregoi të vërtetën pas arrestimit, pasi kishte frikë për jetën e tij dhe të familjarëve, por tashmë që Albert Zaja është arrestuar, ai vendosi të rrëfehet. “Kam patur frike te flas deri me tani sepse me kane kercenuar”, deklaroi i pandehuri. Edhe bashkë I pandehuri tjetër, Rruzhdi Hoda konfirmoi të njëjtën dëshmi.
Pasi dëgjoi rrëfimet e të pandehurve, Gjykata e Apelit Tiranë vendosi të kërkojë informacion nga policia dhe prokuroria, përpara se të shpallë vendimin.
Vladimir Kurti është dënuar përjetë, ndërsa bashkëpunëtori i tij Rruzhdi Hoxha u dënua me 25 vite burgim. Të dy hynë në orët e vona të mbrëmjes së 25 prillit 2018, të maskuar dhe të armatosur në marketin e Agim Bucit në Kamzë dhe hasën rezistencën e tij dhe të gruas për të marrë xhiron ditore. Në pak minuta, opersonat e maskuar qëlluan mbi çiftin e bashkëshortëve, duke lënë të vrarë burrin dhe të plagosur rëndë gruan.
