Ish-presidenti Alfred Moisiu tha në emisionin “Spotlight” se akuzat e DASH për ish-kryeministrin Berisha janë të mbledhura ndër vite duke dhënë edhe një shembull.
Ai përmendi rastin e presionit që Berisha u ka bërë nipërve të tij përmes ish-drjetorit të Aviacionit Gazmend Dibra.
“Shkon drejtori i Aviacionit Civil Gazmend Dibra, u bënte presion nipave të mi që kishin kompani ajrore. ‘I thoni dajës të firmosë shkarkimin e prokurorit, edhe çdo gjë zgjidhet mirë.’ Ky ishte një lloj rikatimi (presion) i tipit mafioz. Si ka mundësi që kryeministri t’i bëjë rikatim (presion) presidentit, kryetarit të shtetit. Sigurisht ai nuk e bëri vet këtë, por Gazmend Dibra s’mund të merrte përsipër një gjë të tillë, se nuk ishte aq budalla. Çfarë janë këto? Këto janë minimi i demokracisë. Pra, një nga akuzat që i bëhet atij nga DASH është pikërisht kjo”, tha Moisiu.
Ish-presidenti tha se Berisha tanimë duhet të përballet me burrëri me këto akuza:
“Kjo nuk është e re, nuk është e padëgjuar. Dhe të mos bëjmë sikur po na bien gjëra të padëgjuara. Budallenj nuk jemi. Ky popull nuk është budalla. Aq më tepër intelektualët e këtij vendi. Duhet të jemi seriozë, gjërat që kanë ndodhur kanë ndodhur. Nuk na vjen mirë. Edhe mua nuk me vjën mirë që një ish-kolegu im, ish-president dhe ish-kryeministër të goditet. Ky është një fakt, këto gjëra kanë ndodhur”, shtoi Alfred Moisiu.
