Kryetari i Partisë Demokratike Lulzim Basha është shprehur i bindur përpara gazetarëve se Sali Berisha nuk i ka mbledhur firmat për të vënë në lëvizje mekanizmat e Kuvendit Kombëtar.
Sipas tij, e gjithë situata ka qenë një bllof.
“Berisha ka qenë për një kohë të gjatë kreu i PD-së, e njeh shumë mirë statutin dhe i njeh shumë mirë rregullat e partisë. E di shumë mirë se si vihen në lëvizje mekanizmat e Kuvendit. Jam thellësisht i zhgënjyer nga tallja që u ka bërë dje demokratëve. Nëse do t’i kishte mbledhur firmat, do t’i kishte dorëzuar sipas statutit, në mënyrë që të nisnim procedurën statutore. Por, nuk e ka bërë këtë gjë pasi e gjitha ka qenë një blof. Atë që e nisi si betejë për demokratizimin e PD-së, përfundoi si betejë për hallet e tij personale”, deklaroi Basha këtë të enjte.
Gjatë një konference të mbajtur një ditë më parë, ish-kryeministri Sali Berisha deklaroi se janë mbledhur 4200 firma, të mjaftueshme për thirrjen e Kuvendit Kombëtar të PD-së.
