Një ngjarje tragjike ka ndodhur në Jemen, ku një gazetare 27-vjeçare shtatzëne, ka humbur jetën pasi një bombë e vendosur në makinën e bashkëshortit të saj shpërtheu.
Bomba ishte vendosur në makinën e bashkëshortit të gruas, i cili po ashtu është gazetar. Mediat shkruajnë se shpërthimi ndodhi, teksa çifti po nxitonte për në spital, pasi 27-vjeçarja do të lindte fëmijën e dytë.
“Bomba shpërtheu ndërsa gazetari Mahmoud al-Atmi e çoi gruan e tij, Rasa Abdallah, në spital për të lindur”, tha një zyrtar. Gazetarët kanë punuar për media të ndryshme vendase dhe ndërkombëtare në gjuhën arabe.
Banorët e zonës thonë se në makinë përveç saj dhe bashkëshortit të plagosur tashmë ka qenë edhe fëmija i tyre i parë, i cili gjithashtu ka humbur jetën nga shpërthimi. Megjithatë ky informacion nuk është konfirmuar ende.
Askush deri më tani nuk ka marrë përgjegjësinë për sulmin. Dyshohet se ishte vepër e rebelëve shiitë Houthi, të cilët kanë luftuar kundër qeverisë së njohur ndërkombëtarisht që nga viti 2014.
