Pas shkarkimit të menjëhershëm nga puna të efektivit SH.T., i cili shtyu dhe rrezikoi jetën e gazetares Anila Hoxha dhe operatorit Endrit Aga, duket se ngjarja nuk është mbyllur me kaq.
Për rastin në fjalë ka reaguar edhe ministri Bledi Çuçi i cili njoftoi masë më të ashpër për efektivin. Ndjekje penale paralajmëroi ministri i brendshëm për policin, duke e quajtur veprimin e tij një shfaqje të shëmtuar.
“Lidhur me incidentin e ndodhur një ditë më parë me gazetaren Anila Hoxha, dua t’ju informoj se efektivi i policisë është larguar nga detyra. Drejtori i Policisë së Shtetit dhe drejtori i SHÇBA kanë komunikuar menjëherë me gazetaren, si dhe në bazë të kallëzimit të saj efektivi do të ndiqet penalisht.
I kërkoj ndjesë dhe e falënderoj znj. Hoxha, si dhe iu bëj thirrje gjithë qytetarëve që ndeshen me efektivë të tillë policie të mos heshtin, por t’i denoncojnë. I garantoj se toleranca për këto shfaqje të shëmtuara si ajo e një dite më parë do të jetë zero. Gjej gjithashtu rastin t’u bëj thirrje efektivëve të Policisë së Shtetit të mos ia lejojnë vetes të bien në këtë nivel, që i përjashton ata automatikisht nga radhët e uniformave blu”, tha Bledi Çuçi në rrjete sociale.
