Gjendet një trup i pajetë në malin me Gropa, me një plagë që ka ardhur nga arma e zjarrit.
Sipas burimeve, bëhet fjalë për biznesmenin e zhdukur nga Tirana, Rruzhdi Hoxha.
Mësohet se pranë trupit të kufomës është gjetur dhe një xhup me njolla gjaku.
Policia ka shkuar në vendin e ngjarjes dhe ka rrethuar zonën, por ende nuk ka dalë me një njoftim zyrtar.
Kujtojmë se biznesmeni 43-vjeçar me banim në Kamzë rezulton i zhdukur prej datës 21 tetor kur edhe dhe familja ka bërë denoncimin në polici.
Hoxha është baba i dy fëmijëve dhe pronar i një biznesi inertesh në dalje të Kamzës.
Në momentin e fundit ai është parë duke pirë kafe diku pranë autostradës Tiranë-Durrës dhe pasi është telefonuar nga miku i tij me iniciale F.Rr. dhe kanë lëvizur me makinën e tij. Policia ka verifikuar kamerat e ka zbuluar se mjeti ku hipi Ruzhdi Hoxha është larguar në drejtim të Kamzës e më pas nga Zall Herri.
Për gati shtatë ditë 43-vjeçari nuk e ka pasur të hapur telefonin, por më pas nga dita e shtunë telefoni i tij është hapur, por nuk është përgjigjur kush.
Familjarët kanë bërë kallëzim tek komisariati nr 5 dhe hetimet kanë nisur fillimisht për largim nga banesa, por më pas çështja ka kaluar për rrëmbim personi në drejtorinë e Policisë së Tiranës. Dosja është marrë në hetim nga sektori i hetimit të krimeve të rënda. Nuk është hera e parë që familja bën denoncim për largim nga banesa për 43-vjeçarin.
Mësohet se edhe dy herë të tjera familjarët kanë denoncuar largimin e tij nga banesa, por që më pas është kthyer.
Mësohet se pas denoncimit, policia ka shoqëruar mikun e tij, i cili ka pasur dhe takimin e fundit me 43-vjeçarin. Ky i fundit është ndaluar dhe po mbahet në paraburgim pasi ka hesape me drejtësisë italiane.
