Policia në Gjirokastër ka ngritur postblloqe në aksin nacional Kakavijë-Gjirokastër. Çdo makinë që kalon i nënshtrohet kontrolleve të imtësishme, për shkak se sot në jug të vendit festohet dita e “JO”-së, e njohur si festa kombëtare e Greqisë.
Minoritarët grekë vijnë në vendin tonë për të zhvilluar ceremoni në varrezat e ushtarëve grekë në zonën e Këlcyrës. Në vendin e quajtur Ura e Leklit ndodhen edhe disa shërbime të Policisë së rendit dhe Rrugores për të ndaluar dhe kontrolluar çdo makinë që kalon në këtë zonë.
28 tetori i vitit 1940 njihet në Greqi si dita e “JO”-së, ditë kjo kur u shënua fillimi i luftës italo-greke. Që prej asaj kohe, përvjetorët e kësaj dite festohen në Greqi si festë kombëtare.
Nga autoritetet janë marrë të gjitha masat për të shmangur ndonjë incident të mundshëm që mund të ndodhë në momentin e nisjes së ceremonisë, në orën 11.00 të ditës së sotme. Deri më tani situata është e qetë dhe pa probleme.
