“Pse duhet të qendroj në Shqipëri?” Studentja në dilemë, ja këshilla që i jep Rama

Pasditen e sotme kryeministri Edi Rama zhvilloi një konsultim publik me nxënësit dhe studentët e Elbasanit.

Takimi u mblodh në kuadër të Strategjisë Kombëtare për Rininë (2022-2029), që do të prodhojë në bashkëpunim me të rinjtë një dokument pune dhe angazhimesh konkrete  të institucioneve kombëtare e vendore, në funksion të fuqizimit të rinisë shqiptare.

I pyetur për arsyet se pse studentët nuk duhet të largohen jashtë vendit Rama tha se kushdo është i lirë të zgjedhë ku do të studiojë dhe jetojë, por si në Shqipëri, si jashtë vendit, kjo botë është e atyre që guxojnë dhe janë të vendosur.

“Disa nga ju kërkuat t’ju themi cilat janë arsyet që të qëndroni këtu dhe mos ikni. Unë pavarësisht pozicionit nga ku flas në këtë rast, nuk kam ndryshuar mendim se si e shoh këtë punë. Çdokush është i lirë dhe në të drejtën e vet të marrë vendimin se çfarë do të bëjmë.

Për fat të mirë nuk jetojmë më siç jetonim deri para 30 vjetësh kur nuk ja bënim këtë pyetje vetes sepse ishte e vështirë ta imagjinoje, jo më të dilje jashtë shtetit. Liria i ka dilemat shumë më të mëdha se zgjedhja e lirë është një zgjedhje shumë më e vështirë se sa imponimi që të vjen nga lart. Kur njeriu është para dilemave duhet të bëjë zgjedhjet e veta, por meqë u pyetëm unë do ta nisja nga e kundërta.

Nuk do thosha arsyet pse duhet të iki, por do filloja nga arsyet pse nuk duhet të iki. Nëse ato nuk janë të mjaftueshme do bëja balancën, por një gjë është e sigurt. Në të gjitha rastet në Shqipëri, jashtë Shqipërisë kjo botë është e atyre që guxojnë dhe janë të vendosur. Kush guxon ja del kudo që të jetë. Pastaj sigurisht që bënë zgjedhjet e veta në varësi se ku do të shkojë dhe sa larg do të ngjitet”, tha Rama.