Vështirësi në sigurimin e lëndës drusore, kuksianët: I marrim drutë me thasë si hajdutë

Ulja e temperaturave dhe afrimi i dimrit rrit kërkesën për sigurimin e lëndës drusore për familjet në Kukës. Sigurimi i lëndës drusore për banorët është kthyer në një sfidë më vete. Mungon tregu, nuk ka një vend të përcaktuar për shitjen e lëndës drusore, dhe po ashtu as firma të liçensuara për tregtimin e tyre.

Banorët detyrohen që me forma të tjera të mundësojnë sigurimin e druve, ndonëse me kosto më të lartë. Ata shprehen se krahas shmangjes së organeve ligjzbatuese ndeshen po ashtu edhe me çmime të larta.

‘Ngrohemi me dru, energjia është shtrenjtë, ka ndërprerje’, shprehet një qytetar, që jeton në zonat malore.

‘Ku me i siguru se nuk ka dru, do ngrohemi me korent, energjia do rritet ne do varfërohemi më tej. I kemi marrë drutë si hajdutë me thasë. Zoti e bëftë mirë, ishalla nuk bie borë e madhe’, shprehet një qytetar.

Në Kukës pjesa më e madhe e familjeve e sigurojnë ngrohjen me lëndë drusore. Kjo, pasi çmimi i energjisë është i papërballueshëm. Kukësi bën pjesë në zonat malore, çka shoqërohet me dimër të ftohtë dhe temperatura të ulta.