Personi që shihni në foton e mëposhtme është Demir Backa, 57-vjeçari i cili mbeti i vdekur pas një atentati të ndodhur mbrëmjen e kaluar në Fier. 57-vjeçari ndërroi jetë në mjediset e spitalit të Fierit pak pas ngjarjes, teksa autorët e saj vijojnë të jenë në kërkim nga ana e policisë.
Ngjarja që tronditi qytetin e Fierit u shënua rreth orës 20:40 minuta në vendin e njohur si rrotullimi i një qendre tregtare në Fier, kur biznesmeni sapo po hipte në automjetin e tij tip Audi. Gëzhojat e kallashnikovit u shpërndanë kudo teksa Backa u transportua për në spitalin e Fierit, mirëpo nuk mundi dot të mbijetojë. Ngjarja ngriti në këmbë policinë e Fierit kur vetëm pak minuta pas saj, në anën tjetër të qytetit u gjet një automjet tip ‘Benz’, totalisht i djegur, që mendohet se u përdor nga autorët e ngjarjes e më pas u braktis dhe iu vu zjarri për të humbur gjurmët.
Blutë kanë sekuestruar kamerat e sigurisë si pranë vendit të ngjarjes ashtu edhe në zonën ku u gjet e djegur makina, për të mundësuar identifikimin e autorëve. Viktima pritet që të përcillet sot në orën 15:00 për në banesën e fundit.
