“Ai rrojti sa deshi e si deshi, ndërsa ne…” Ish-prokurori i komunizmit ndërroi jetë, Mentor Kikia jep mesazhin e fortë

Gazetari i njohur Mentor Kikia ka reaguar pas disa etiketimeve që mediat i bënë ish-kryetarit të Gjykatës së Lartë në komunizëm Arianit Çela, pas ndarjes nga jeta të tij.

Sipas Kikisë, prokurori monstruoz i diktaturës jetoi sa deshi dhe si deshi, ndërsa ne ende nuk dimë të bëjmë drejtësi, nuk dimë të ndajmë epokat.

“Në 1990, ra vetëm qeveria komuniste – mos ju gënjejë mendja se e rrëzuam ne studentët me Sali Berishën në krye. Ajo kishte falimentuar dhe u shemb. Por, pas kësaj ne nuk e shkulëm komunizmin, nuk i ndëshkuam njerëzit që kishin bërë krime, nuk bëmë drejtësi”, shkruan ai ndër të tjera.

MESAZHI I PLOTE:

Në 1990, ne nuk shkatërruam komunizmin, por shkatërruam Shqipërinë!

Lajmi për vdekjen e Aranit Çelës, prokurori monstruoz i diktaturës, që dërgoi dhjetra njerëz në varr e qindra të tjerë nëpër burgje, mori shumë vemendje. Gjatë 24 orëve të fundit kam lexuar aq shumë etiketime dhe akuza për të sa nuk ishin thënë gjatë 30 viteve post-dikaturë. Pretencat e tij nuk ishin juridike, por fjalime politike, prej një sekretari partie.

Aranit Çela rrojti sa deshi e si deshi. Pleqërinë e shtyu më së miri, mes njerëzve të tij dhe vdiq në shtrat, në pritje të mbushte një shekull jetë. Nuk e zuri as haka(sikundër thuhet se ndodh) e atyre e masakroi e u mori jetën vetem sepse ishin më të ditur se ai dhe soji i tij. Si ky vdiqën të gjithë ata që kishin lyer duart me gjakun e njerëzve të pafajshëm.

Kjo është një nga arsyet e mëdha se përse ne vazhdojmë të tërhiqemi zvarrë si shoqëri. Ne nuk dimë të bëjmë drejtësi, nuk dimë të ndajmë epokat.

Në 1990, ra vetëm qeveria komuniste – mos ju gënjejë mendja se e rrëzuam ne studentët me Sali Berishën në krye. Ajo kishte falimentuar dhe u shemb. Por, pas kësaj ne nuk e shkulëm komunizmin, nuk i ndëshkuam njerëzit që kishin bërë krime, nuk bëmë drejtësi.

Në vend të komunizmit, ne shkulëm me rrënjë e me degë ekonominë që ishtë ngritur në kohën e komunizmit.

Shkulëm nga themelet çdo fabrikë e uzinë, i shitën për skrap në Mal të Zi. Shkulëm plantacionet e agrumeve, vreshta, ullishta, sera….hekurudha, kanale vaditëse, rrafshuam dhe dogjëm çdo gjë që kishim ngritur me djersën dhe gjakun tonë.

Por komunizmin dhe kriminelët e tij jo.