Partia Demokratike deklaron se institucionet e drejtësisë dhe Policia e Shtetit i njohin mjaft mirë politikanët e lidhur me krimin e organizuar, mirëpo nuk veprojnë.
“Organet ligjzbatuese shqiptare disponojnë të dhëna të plota për politikanë që kapen në përgjime, telefonata me eksponentë të rrezikshëm të krimit të organizuar”, tha Sekretari i Përgjithshëm i PD-së gjatë një interviste për emisionin Opinion.
Ai vijoi duke shtuar se institucionet nuk veprojnë pasi shkëmbejnë favore me politikanët në fjalë.
Para kësaj interviste, Gazmend Bardhi postoi në rrjetet sociale një video, ku pyeteshin qytetarët në qoftë se ishin pro, apo kundër vettingut në politikë. Sipas përgjigjeve të dhëna në videon e publikuar nga PD, qytetarët mbështesin masivisht një proces të tillë.
