E trishtë, ndahet nga jeta aktorja e njohur

Ndahet nga jeta aktorja Filika Dimo. Lajmin e dhimbshëm e ka publikuar faqja zyrtare në rrjetet sociale e Teatrit “Aleksandër Moisiu” në Durrës. Aktorja që u shua në moshën 82-vjeçare prej disa vitesh jetonte në Belgjikë.

Filika Dimo u lind në Durrës në datën 1 gusht të vitit 1939. U diplomua në departamentin e aktrimit në Institutin e Lartë të Arteve në Tiranë. Pas studimit, ajo nisi të punojë në Teatrin Popullor në Tiranë.  Pjesën më të madhe të aktivitetit e ka pasur në Teatrin “Aleksandër Moisiu” ku dhe ka punuar si aktore e roleve kryesore në shumë vepra dramatike krahas aktorëve të tjerë durrsakë si Nikolin Xhoja, Spiro Urumi, Kadri Pirro, Marta Burda, Lazër Vlashi, Gaqo Spiro etj.

Debutimin e saj në kinematografi e bëri në vitin 1959 me rolin e  Shpreses në filmin Furtuna. Ajo luajti edhe në 4 filma të tjerë artistikë. Filmi qe e bëri më të njohur dhe më të vlerësuar atë si një aktore, është filmi televiziv me 2 seri i RTSH-së “Koha nuk pret”, me rolin e Beatrice Shmid.