LIGJET E BIZNESIT
Pasi LSI ngriti padi për të në lidhje me inceneratorin e Fierit, ka ardhur dhe reagimi i ish-sekretarit të Përgjithshëm në Ministrinë e Mjedisit Alqi Bllako, aktualisht deputet i Partisë Socialiste.
Ky i fundit është shprehur se ka patur zero rol në çdo procedurë vendimmarrëse për dhënien e koncesioneve, në kohën kur dikasteri ku punonte drejtohej nga Lefter Koka.
“Jam njohur nëpërmjet medias me padinë e tretë apo të katërt për të njëjtën çështje, e cila rihidhet në treg me qëllimin e vetëm për të prodhuar zhurmë.
Pavarësisht pozicionit që kam mbajtur si Sekretar i Përgjithshëm pranë Ministrisë së Mjedisit, ligji për koncesionet dhe partneritetin publik-privat i ka fare qartë të përcaktuara rolet dhe detyrat e çdo institucioni të përfshirë në proces apo titullar/anëtar të komisioneve përkatëse.
Duke shprehur besimin se kolegët e çdo institucioni kanë zbatuar rigorozisht ligjin, deklaroj me përgjegjësi të plotë se kam patur zero rol në çdo procedurë vendimmarrëse për dhënien e këtyre koncesioneve direkt apo indirekt. Në çdo rast, ju përket vetëm organeve të drejtësisë të përcaktojnë nëse ka ose jo shkelje; dhe nëse po, cilët janë personat përgjegjës.
Sa i përket atyre që vazhdojnë të hedhin në treg akuza të tilla, mendoj se vetingu i politikanëve do t’i jepte njëherë e përgjithmonë fund kësaj tallje publike”, thekson ai.
