Një vajzë e futi në kurth? Dalin detajet, ja si u ekzekutua ish-anëtari i bandës së Lushnjes

Dalin detaje të reja në lidhje me ekzekutimin mafioz të ish-anëtarit të bandës së Lushnjes, Alban Semaku.

Ky i fundit njihej dhe me emrin Elton Kinezi.

Kujtojmë që 38-vjeçari nga Peqini u gjet i vrarë me armë zjarri të dielën pranë lumit Shkumbin.

Bëhet me dije se Semaku dyshohet se është nxjerrë në pritë nga persona që nuk janë identifikuar. Po i njëjti burim theksoi se personi që e ka nxjerrë në pritë, duke e çuar në vendin që u ekzekutua sipas të gjitha gjasave ka qenë i njohur i tij.

Nuk përjashtohet mundësia që në drejtimin e makinës që dërgoi Semakun pranë lumit Shkumbin të ketë qenë një femër.

Në momentin që ka mbërritur në vendin ku u gjet i vdekur, 38-vjeçari është përballur menjëherë me autorët të cilët dyshohet të kenë qenë të fshehur në shkurret ku u gjet i pajetë. Ndërkohë, nga këqyrja paraprake e vendit të ngjarjes, por dhe nga dinamika e ekzekutimit dyshohet që viktima ka tentuar të largohet duke kaluar murin, por nuk ka mundur.

Kjo vërtetohet nga këqyrja e vendit të ngjarjes ku janë konstatuar njolla të shumta gjaku në një distancë të gjatë çka bën që grupi hetimor t’i mëshojë këtij varianti. Nga dëshmitë e banorëve të zonës nuk janë dëgjuar të shtëna çka ngre dyshime të forta se autorët kanë qëlluar me një armë me silenciator.