“BE mbështet Turqinë” Vizita e lamtumirës, kancelarja Angela Merkel takohet me Erdogan

Në prag të largimit të saj nga detyra si kancelare e Gjermanisë, Angela Merkel po vijon turin e saj të lamtumirës në shtete të ndryshme.

Këtë të shtunëë ajo ishte në Turqi, ku u takua me kreun e shtetit turk, Recep Tayip Erdogan teksa i shprehu mbështetjen e Bashkimit Europian për emigracionin e paligjshëm.

“Ne duam të parandalojmë trafikimin e qenieve njerëzore. Është thelbësore… që BE të mbështesë Turqinë në këtë drejtim,” tha ajo.

Merkel theksoi se Turqia dhe Gjermania kanë gjithmonë interesa të përbashkëta dhe shtoi se kështu do ta shohë qeveria e ardhshme federale.

Ajo vlerësoi edhe kontributin e shtetit turk në kuadër të NATO-s, por dha edhe kritika për liritë e njerëzve.

“Si një aleate e NATO -s, Turqia është një partner i rëndësishëm për ne. Unë isha kritike rreth zhvillimeve për të drejtat e njeriut dhe liritë individuale. Unë gjithmonë e kam thënë këtë. Sigurisht, ne kërkuam zgjidhje, mund të kemi këndvështrime të ndryshme, jemi të lidhur gjeostrategjikisht me njëri-tjetrin, jemi të varur. Ne folëm në detaje për talebanët, për refugjatët, për Afrikën. Ne kemi gjithmonë interesa të përbashkëta. Kështu do ta shohë qeveria e ardhshme federale. Qeveria e ardhshme do ta shohë këtë në të njëjtën mënyrë, me të gjitha aspektet pozitive dhe shqetësuese të marrëdhënieve midis dy vendeve. Paqja dhe besimi ynë janë të ndërlidhur”, shtoi ajo.

Konferenca për shtyp pasoi një takim njëorësh midis Erdogan dhe Merkel në Rezidencën Huber. Të dy udhëheqësit diskutuan çështjet në axhendën e tyre, veçanërisht marrëdhëniet dypalëshe.

Ndërsa nga ana e tij, Erdogan është shprehur se racizmi, islamofobia, ksenofobia dhe diskriminimi mbeten problemet kryesore në komunitetin turk në Europë.

Duke folur në një konferencë të përbashkët shtypi me kancelaren gjermane Angela Merkel në Stamboll, Rexhep Tajip Erdogan tha: “Komuniteti turk në Gjermani përbën pasurinë tonë të përbashkët dhe mban një aspekt të rëndësishëm shoqëror të marrëdhënieve tona.”

Erdogan shprehu shpresën se Merkel do të vazhdojë të kontribuojë në miqësinë mes dy kombeve pas largimit nga detyra.