Gledis Nano është emëruar drejtor i Përgjithshëm i Policisë së Shtetit pas dorëheqjes së Ardi Veliut.
Emërimi erdhi pas propozimit nga ministri i Brendshëm, Bledi Çuçi.
Më pas urdhëri u miratua nga Këshilli i Ministrave, me firmë nga zv.kryeministri Arben Ahmetaj, pasi Edi Rama ndodhet në Slloveni.
Gledis Nano është oficer karriere në Policinë e Shtetit prej më shumë se një dekade.Gledis Nano ka mbajtur për një kohë të gjatë detyrën e drejtorit në Drejtorinë e Antiterrorit, në Policinë e Shtetit. Ai u emërua në këtë detyrë në 17 shkurt 2016, pas një pune të gjatë dhe eksperience 17-vjeçare si pjesë e Policisë së Shtetit.
Gjatë të gjithë karrierës Nano ka kryer detyra të ndryshme në polici ku ka pasur rezultate në zbulimin e ngjarjeve të rëndësishme.
Në vitin 2013 ka kryer hetimet e dosjes se “Imameve” të arrestuar për terrorizëm, ngjarje e cila ka pasur shumë jehonë si një nga më të suksesshmet në këtë fushë në të gjithë rajonin.
Gledis Nano po ashtu drejtoi të gjithë operacionin sekret të dëbimit një muaj më parë të diplomatëve iranian nga Shqipëria.
Gjithashtu, Gledis Nano ka udhëhequr operacionin për të nxjerrë nga Kampi Al Hol në Siri, shtetasit shqiptarë që mbaheshin aty, mes të cilëve edhe Alvi Berishën. Ndërsa në gusht të këtij viti, Gledis Nano ishte sërish protagonist i riatdhesimit të grave dhe fëmijëve shqiptarë nga kampi famëkeq.
Gledis Nano, ka qenë një nga emrat më kyç të operacioneve të riatdhesimit të shqiptarëve në kampet e ferrit në Siri. Ai ka marrë certifikatë vlerësimi për kontributin e dhënë në luftën kundër terrorizmit global, e ndërsa për punën e tij në këto operacione të rëndësishme është vlerësuar edhe nga ish-ministri i Brendshëm, Sandër Lleshaj. Në certifikatën e dorëzuar shkruhet “Për partneritetin e jashtëzakonshëm dhe dedikimin në mbështetje të Ambasadës Amerikane në Tiranë Shqipëri, dhe përpjekjet e përbashkëta në luftën botërore ndaj terrorizmit. Vendosmëria juaj dhe përkushtimi në luftën kundër terrorizmit ka sjellë kredite të mëdha e të shtuara tek vetja juaj edhe për Drejtorinë e Antiterrorit dhe Policinë e Shtetit”.
Ai ka qenë në “garë” për këtë post të rëndësishëm përballë Edmond Rizaj, drejtorit të hetimit të krimit, por në fund Çuçi i çoi si propozim Këshillit të Ministrave emrin e Nanos.
Ditën e djeshme, Veliu i dorëzoi Kryeministrit Edi Rama letrën e dorëheqjes, ku shkruante se do i përkushtohej më shumë familjes. Kjo dorëheqje erdhi 10 ditë para përfundimit të afatit 100 ditor që kryeministri Edi Rama kishte vënë për riorganizimin e Policisë së Shtetit.
